Getroud met Rugby gaan oor veel meer as 80 minute se lynstane en losgemale op die veld.
Getroud met Rugby is soos Binnelanders deur ’n paar gedaantewisselings. Dit was aanvanklik ’n dramareeks wat deur Deon Opperman en Hanli Rolfes vervaardig is. Die eerste episode is op 7 April 2009 uitgesaai. Ná vyf seisoene is die reeks, wat draai om die hardnekkige Stryders-rugbyspan, in ’n sepie omskep.
Oor die afgelope 14 jaar het akteurs soos Werner Coetser, Christel van den Bergh, Altus Theart en Ilse-Lee van Niekerk in die sepie verskyn. Hul en ander se karakters, sowel as boeiende storielyne, het kykers op ’n mallemeule van emosies geneem. Allerlei intriges, skandale, huwelike, seksuele verhoudings, rugbypolitiek en verraad het van die veld af ontvou.
Die fiktiewe plaaslike kroeg, Potties, het ook ’n gewilde venue geword vir Afrikaanse musikante en optredes in die sepie.
Die sepie het in 2020 ’n SAFTA-toekenning vir beste draaiboek ingepalm.
Maar, ná 14 jaar kom dié gewilde sepie in September 2022 tot ’n einde. Die verfilming van die laaste seisoen sal in Julie 2022 begin. Die laaste episode word op 30 September 2022 op kykNET (DStv-kanaal 144) uitgesaai.
Vir nou is dit nog beskikbaar om te kyk op DStv, DStv Online en Showmax. Die oorspronklike dramareeks se 63 episodes is ook op Showmax beskikbaar.
